BIAXIS TURÍSTICUS

Segundu biaxi: su sartu e is montis

De Dolianova parteus.
Po sa genti chi bolit abarrai in logus obertus su sartu de Dolianova tenit medas camineras naturalis de fairi a pei, in bicicreta e a cuaddu puru. A brintai aiuntrus de sa vegetatzione birdi mediterranea partiollesa at a donai entusiasmu mannu de siguru.Una passillada bella mancai siat tostada po su corpus, est cussa de atruessai sa foresta de su demàniu de Monti Arrubiu, po lòmpiri a is peis de su Monti Cirronis de innui si podit castiai su gulfu de Casteddu. Unu atru logu bellu meda po froris e béstias est “Su Carropu de Nicolo“ e a cussu est acapiada sa paristória de su frori de sa valeriana chi si benit boddia a mesunoti de su 24 de Idas in mesu de su carropeddu at a portai biadesa e sorti.
Atras camineras interessantis funt cussas chi andant de “Su Cuili de is Cocus” concas a Dolianova. Sa bisita a is mitzas est unu atru biaxi de interessu mannu poita ponit in luxi is diferentis logus archeológicus chi ddoi funt puru, e testimóngiat s’arrichesa de is àcuas partiollesas cun is mitzas chi nci funt: sa Mitza de Aramu, sa Mitza de s’Arrexini, sa Mitza de su Tiriaxu, sa Mitza de Sa Cotassa, sa Mitza de Sa Teula, sa Mitza de Pirastu, sa Mitza de Salamu, sa Mitza de S’Ilixi, sa Mitza Sergada, sa Mitza de Sa Cannadedda, sa Mitza de su Acu de Is Figus, sa Mitza Sa Costa de Cubeddu, sa Mitza de Giorgi Porru, sa Mitza e S’Oru, sa Mitza de Brai Zanda

Unu atru biaxi de no perdi est cussu chi portat a su padenti de sa Colonia innui aintrus de su birdi ddoi est sa cresiedda de Santu Miali innui depit passai amarolla chini est andendi a Sínnia e a su monti de Serpeddì. Primas de si abbenturai in is montis si podeis arristorai papendi unu mandiari de su logu in su centru turísticu de “Sa Colonia” chi donat sa possibilidadi de ddoi passai sa noti puru.

1) In is montis de sa bidda nci funt insediamentus archeológicus medas, sa primu firmada est a su nuraxi “Sa Domu de s’Orcu” postu comenti a guàrdia in d’unu apostamentu po billai e protegiri is logus chi podiant èssiri atacaus de is stràngius.

2) Pagu atesu ddoi est “Sa Mitza de s’Ossu”, logu de cultu feníciu innui si fadiant funtzionis sacrificalis po su cultu de su fogu.

3) Calendi asuta de sa Bia Provinciali e dopu èssiri fatu unu pagu de tretu passendi in una bia de sartu in mesu a sa pineta, si passat Sa Mitza de s’Oru e si lompit acanta de una tumba de gigantis de su períudu prima de is nuràgicus. Si tratat de unu logu sacru aundi si fadiant ritualis medas. Chini bolit si podit arristorai in sa locanda adoru de is Mitzas in Santu Giorgi.

Tertzu biaxi: is casifícius