FESTAS E SAGRAS

In su 1905 s’èssiri postus impari Sicci e Santu Pantaleu no at mudau is traditzionis religiosas. Ancora hoi esistint duas parróchias e duus santus patronus: Santu Pantaleu e Santu Brai. Is festas po Santu Pantaleu si faint sa segunda cida dopu Pasca Manna e su 27 de Argiolas. Sa festa de sa segunda cida pustis de Pasca Manna est scéti de crésia. Is celebratzionis si faint in sa Seu e sighint cun sa prucessioni manna in is bias de su villageddu antigu.
Su 27 de Argiolas, a sa festa de crèsia si acumpangiant is festeggiamentus civilis chi si faint in Pratza Europa.
Is festas po Santu Brai funt scéti de crèsia e si faint su 3 de Friaxu e s’úrtimu Domínigu de Austu.
Sa festa de su 3 de Friaxu est fata impari a sa Candelòra. Su merì de su 2 si fait sa funtzioni innui in prima bista nci funt « Sa Priorissa » e is duas « Priorisseddas ».


Dopu sa funtzioni, si fait una prucessionedda chi lompit fintzas a su fogadoni. Sa dìa de Santu Brai comenti a momentu printzipali tenit sa funtzioni eucarística precédia de una prucessioni innui partecipant:” Sa Priorissa e is Priorisseddas” de Santu Brai, de Santu Pantaleu, impari a cussas de s’annu innantis puru, de Serdiàna e de Soléminis.
A s’acabada de sa funtzioni su vicàriu ponit duas candelas beneditas de truessu in su gùturu de sa genti, donat a totus “Pirichiteddus” e drucis chi “Protegint su dolori de gùturu”, aici narant.
Is Sagras prus importantis funt acapiadas a is festeggiamentus de Santu Giorgi, su Lunis pustis sa Pasca de su Spiritu Santu, e de Santu Miali, su 1 Domínigu de Argiolas, e a issus funt onoradas duas cresieddas in su sartu de is montis de Partiolla. In prus a is festas religiosas, a partiri de sa segunda cida a sa tertza cida de Argiolas, si fait su “Festival dolianovesu”, innui ddoi faint atividadis culturalis, isportivas, artísticas e sotzialis.

Su Festival, nàsciu in su 1984 gratzias a sa Pro Loco e a su Cumunu de Dolianova, est unu momentu forti po fàiri atobiai is turistas e is emigraus chi ndi aprofitant de custu períudu po ndi “torrai a domu insoru” puru.

Biaxis turísticus »