UNU PAGU DE ISTÓRIA

Dolianova s’agatat in su coru de su Partiolla. S’arrexini de su nòmini cosa sua no si scit de siguru de innui lompit. Certus istudiosus narant ca su nòmini siat de su tempus de is nuraxis, ma siguramenti latinu est poita is romanus dda tzerriànt Pars Olea po ammostai ca in custu logu nci fiant medas olias.

Su 25 de su mesi de Làmpadas de su 1905, candu is biddixeddas de Santu Pantaleu e de Sicci si ponint ìmpari, nascit ufitzialmenti Dolianova. Ma in su sartu nci funt medas logus archeológicus chi testimongiant ca s’òmini nci fiat giai de meda tempus innantis. Fortzis is montis donànt cassagioni meda e sa possibilidadi de si difendi de is stràngius puru. Podeus arregordai medas logus innui nci fiat s’òmini: Sa domu de s’orcu, Sa mitza Salamu, Sa domu de s’ossu.

Torrendi agoa cun su tempus, teneus materiali de su Mesuevu comenti a ossus de òmini, a orechinus, a vasus, a monetas e a perdas.
Foras de dúbbiu, is crésias funt su sinnu prus forti chi sa istória at lassau in Dolianova. Nci ndi funt medas. In dònnia modu hoi nci funt is crésias de Santu Pantaleu e de Santu Brai chi aparteniant a is biddixeddas primas de s’éssiri postas impari.

Dolianova no est scéti istória o arti, ma issa producit puru. Su logu cosa sua est unu Centru de traballu cun arrexis fortis in sa laurera e in s’allevamentu. Pustis cun su tempus sa cosa est mudada e duncas est nàscia sa Bidda manna de hoi chi rapresentat unu logu diferenti a sa citadi ma no rinunciat a is servítzius e in su própiu momentu apoderat s’identidadi sua.

Arti e cultura »