IS ATRAS CRÉSIAS

SANTA LUXIA

Sa Crésia tenit formas sémpricis e motivus de crara arréxini ispanniola. Is primus traballus de ristruturatzioni e is novas a riguardu sa festa in onori a sa Santa funt de su 1633. Hoi sa Crésia est imperada scéti in ocasionis ispetzialis.

SANTU SEBRESTIANU

Sa Crésia fiat istétia pesada comenti a promiténtzia pustis chi sa pesti iat fertu sa bidda in is annus chi andant de su 1652 a su 1656. Insunterus est istétiu allogau su ritu antigu in onori a su Santu, fadendi su fogadoni chi est allutu su 19 de Gennargiu, su merì innantis sa festa de crésia.

SANTA MARIA

A parti de foras tenit imbucadas e fentanas in perda sa crésia e aintrus in su presbitériu s’agatat unu altari de linna de iscola de su Setixentus bellu meda. Una navada scéti tenit, innui ddoi est in su muru acostau aintrus de sa teca, sa Madonna Dormia e su Pipiu Gesus. No teneus notítzias siguras apitzus de s’annu chi ndi dd’ant pesada, scireus de siguru scéti ca su ritu de s’Assunta antigu meda est.

SANTU MIALI

Sa Crésia de Santu Miali Arcàngelu apartienit a sa parrochia de Santu Brai e s’agatat in su Bruncu de Santu Miali, a 7 chilòmetrus de sa bidda. Issa est istétia mudada intramesu su 1969 e su 1970 apitzus de sa crésia bécia chi cun su témpus s’est spérdia.

SANTU GIORGI

In Santu Giorgi, a 500 metrus de altària, nc’est sa cresiedda de su Santu chi apartienit a sa parrochia de Santu Pantaleu innui si lompit fadendi sa Bia cumunali de Emiliu Lussu.
In sa Bia podeus castiai olivàrius, menduleddas e figumorisca. Sa Crésia de Santu Giorgi fortzis de su témpus Bizantinu est, ma no est sigura sa datadura.